VOR 4

Gardavatn – Feneyjar - Tíról

30. apríl – 11. maí 2009  - 
Fararstjóri: Hlín Gunnarsdóttir

Gardavatn hefur verið einn vinsælasti áfangastaður Íslendinga til margra ára, enda líkti Goethe staðnum við himnaríki og skyldi engan undra. Flogið verður til Frankfurt og gist fyrstu nóttina í Ulm. Þaðan verður ekið til Riva del Garda og gist í 5 nætur. Farið í siglingu á Gardavatni til Limone og í áhugaverðar skoðunarferðir, svo sem til Feneyja og Veróna. Áfram er haldið til Seefeld í Tíról, Austurríki, en þar er mikil náttúrufegurð. Gist í 3 nætur í Seefeld og síðan í 2 nætur í Würzburg í Þýskalandi í lokin. Þrátt fyrir mikið tjón í stríðinu skartar borgin enn gömlum byggingum. Farið verður á útimarkað, hádegisverður snæddur í kastala hjá vínbónda og margt fleira.

30. apríl                 Flug til Frankfurt og ekið áfram til Ulm
Brottför frá Keflavík kl. 7.25. Mæting í Leifsstöð 2 klst. fyrir brottför. Lending í Frankfurt kl. 12.50 að staðartíma. Frá Frankfurt verður ekið til Ulm og gist þar fyrstu nóttina.

1. maí                    Ekið til Riva del Garda á Ítalíu
Eftir morgunverð verður ekið suður á bóginn, yfir Brennerskarð og inn til Ítalíu um Suður-Tíról. Endað í bænum Riva del Garda við Gardavatn og gist þar næstu 5 nætur.

2. maí                    Sigling – Limone og Malcesine
Sigling á Gardavatni. Farið til Limone, sem er einn fallegasti bærinn við vatnið og áð þar í 2 klst. Síðan er siglt til Malcesina sem er mjög eftirsóttur ferðamannabær og stoppað í 3 klst. Þar verður hægt að komast á útimarkað eða upp á Monte Baldo fjallið, sem er hæsta fjall við Gardavatn. Þaðan er ekið til baka á hótelið.

3. maí                    Dagsferð til Feneyja
Í dag verður lagt snemma af stað og farið til Feneyja. Borgin er engu lík með sínar 200 hallir við Canal Grande, en þessi þekkta siglingaleið liggur tæplega 4 kílómetra um borgina. Við skoðum Markúsartorgið og ekki má gleyma ævintýrahöllinni úr Þúsund og einni nótt, sem er í austrænum stíl og ein merkilegasta kirkjubygging veraldar. Frjáls tími verður til að fara á söfn eða njóta mannlífsins.

4. maí                    Skoðunarferð og frjáls dagur í Riva
Farið verður í skoðunarferð um Riva, en svo gefst frjáls tími til að skoða sig um í þessum snotra bæ, með sínum litlu götum, verslunum og mjög skemmtilegri strandlengju.

5. maí                    Dagsferð til Veróna
Í dag verður farið til Veróna, einnar fallegustu og elstu borgar á N-Ítalíu. Borg menningar og lista, en frægust er hún sem sögusvið leikrits Shakespeares um Rómeó og Júlíu. Þar er líka Arenan, sem er þriðja stærsta hringleikahús veraldar.

6. maí                    Rovereto og Seefeld
Nú kveðjum við þennan fallega stað og höldum til Austurríkis. Á leiðinni verður komið við í Dro, þar sem er að finna stærstu skóverslun á N-Ítalíu, en þá verður farið í kastala fyrir ofan Rovereto. Við fáum stutta leiðsögn um kastalann og snæðum síðan léttan hádegisverð að hætti íbúanna í dalnum, með vínsmökkun í leiðinni. Komum til Seefeld sem er yndislegur bær í Tíról og gistum þar næstu 3 nætur.

7. maí                    Frjáls dagur
Rólegur dagur, þessi fallegi bær kannaður og þeir sem vilja geta tekið kláf upp á fjall.

8. maí                    Innsbruck
Í dag verður ekið til hinnar fallegu borgar Innsbruck, höfuðstaðar Tíról.

9. maí                    Würzburg
Nú kveðjum við Seefeld. Leggjum snemma af stað og ökum til Würzburg í Franken vínhéraðinu í Þýskalandi og gistum þar í 2 nætur.

10. maí                  Dagur í Würzburg
Würzburg á sér langa sögu og er þar margt að skoða. Þetta er mjög falleg og lífleg borg sem varð fyrir miklum skemmdum í seinni heimsstyrjöldinni, en hefur verið byggð upp í sinni upprunalegu mynd. Það eru 85 kirkjur í borginni en aðeins um 130.000 íbúar. Farið verður í stutta skoðunarferð og síðan gefinn frjáls tími.

11. maí                  Heimferð
Nú er komið að heimferð. Eftir morgunverð verður ekið til Frankfurt. Brottför þaðan kl. 14.00 og lending í Keflavík kl. 15.35 að staðartíma.


Fararstjóri getur fært milli daga eftir því sem þörf þykir þegar komið er á staðinn.

Fararstjóri: Hlín Gunnarsdóttir